ہندستان اور ہندستانیوں کو درپیش فرقہ پرستی آج سب سے بڑا مسئلہ ہے۔ ہمارے جمہوری ڈھانچے اور قومی اتحاد کو فرقہ پرستوں کی جانب سے سنگین خطرہ ہے۔ اس کتاب میں فرقہ پرستی کے آغاز و ارتقا کے مختلف پہلوؤں کو تاریخی پس منظر میں دیکھتے ہوئے یہ جائزہ پیش کیا گیا ہے کہ فرقہ پرستی بنیادی طور پر ایک اصول اور ایک طرزِ فکر ہے لہذا اُس سے اُسی بنیاد پر نمٹنا ہوگا۔

استعماری حکومت نے کانپور فسادات تحقیقاتی کمیٹی رپورٹ کی ۱۹۳۳ء میں اشاعت کا استقبال اس پر پابندی لگا کرکیا۔ انڈین نینشل کانگریس کی نامزد چھ رکنی کمیٹی نے کانپور کے ۱۹۳۱ء کے شدید فرقہ وارانہ فسادات کی تحقیق کا بیڑا اٹھایا اور جدید ہندوستان میں فرقہ واریت کے آغاز اور اس کے ارتقا اور فروغ کے متعلق بہترین ممکن الحصول تجزیہ کیا اور ساتھ ہی اس کے سدباب اور اسے جڑ سے اکھاڑ پھینکنے کی تدابیر پیش کیں۔