حسن نعیم نے اردو غزل کو ایک نیا مزاج اور نیا لہجہ اس وقت عطا کرنے کی کوشش کی تھی جب خلیل الرحمان اعظمی نے ترقی پسند ادبی تحریک اور اس کے زیرِ اثر تخلیق کی جانے والی شاعر پر نقد و جرح کی تھی۔ لیکن جدید اردو شاعری کا وہ دور ابھی شروع نہیں ہوا تھا جو لا یعنیت اور انفرادی کرب کے اظہار پر ختم ہوا۔ حسن نعیم نے اپنی غزلوں میں حوصلہ مندی سے اپنا رشتہ برقرار رکھتے ہوئے خوب صورت تخلیقی تجربے کیے مگر غزل کے کلاسیکی حسن اور رچاو کو قربان نہیں ہونے دیا۔